बीड मध्ये शाळेने केले विद्यार्थ्यांचे जीवन अंधारमय, आरटीई कायद्याचे उल्लंघन करत केली शाळा बंद.
✒श्याम भुतडा, बीड जिल्हा प्रतिनिधी✒
बीड,दि.10 जुन:- बीड शहरातून एक धक्कादायक बातमी समोर आली आहे. बीड येथील शाहू नगर भागातील श्री संत ज्ञानेश्वर इंग्लिश स्कूल शाळेने मोफत शिक्षणाचा अधिकार कायद्याचे उल्लंघन करत विद्यार्थ्यांच्या पालकांना कुठलीही पूर्व सूचना न देता शाळा बंद केली आहे. यामुळे या शाळेत मोफत शिक्षणाचा अधिकार कायद्या आरटीई अंतर्गत मोफत प्रवेश मिळालेल्या विद्यार्थ्यांच्या पालकांना आता आपल्या पाल्याचे भविष्य अंधारमय झाल्यामुळे आता काय कराव असा प्रश्न पडला आहे. यामुळे या सर्व संतप्त पालकांनी एकत्रित येत जिल्हा परिषदेच्या शिक्षण विभागासमोर ठिय्या आंदोलन केले. तसेच शिक्षण उपसंचालक यांना अडवून विद्यार्थ्यांचे शैक्षणिक नुकसान थांबवा अशी मागणी केली.
कोरोना वायरस महामारीमुळे शासनाने संपुर्ण राज्यात आणि जिल्हात कडक लॉकडाउन लावले होते. या काळात ऑनलाइन शिक्षण पद्धती राबवण्यात आली होती.परंतु संत ज्ञानेश्वर इंग्लिश स्कूल शाळेने मागच्यावर्षी विद्यार्थ्यांना ऑनलाईन शिक्षण देखील दिले नाही. या उपर विद्यार्थ्यांना शाळेचे वह्या पुस्तकांची किट घेण्यास भाग पाडले. ही शाळा मान्यताप्राप्त आहे. या शाळेची आरटीई पोर्टलला नोंद आहे. या शाळेमध्ये आरटीईअंतर्गत मोठ्या प्रमाणात प्रवेश आहेत. शिक्षण हक्क कायद्याअंतर्गत एकदा प्रवेश झालेल्या विद्यार्थ्यांना 1 ली ते 8 वी पर्यंतचे शिक्षण सक्तीचे आणि मोफत दिले जाईल असे स्पष्ट आहे. परंतु शाळा प्रशासनाने शाळाच बंद करण्याचा निर्णय घेतल्याने शिक्षण हक्क कायद्याचे उल्लंघन केले आहे. तसेच या शाळेत आरटीई अंतर्गत प्रवेश मिळालेल्या गोरगरीब विद्यार्थ्यांना अधांतरी राहण्याची वेळ आली आहे. आता या गोरगरीब विद्यार्थ्यांना शिक्षण हक्क कायद्यांतर्गत मिळालेल्या मोफत शिक्षणापासून वंचित रहावे लागणार आहे. त्यामुळे या विद्यार्थ्यांचे भवितव्य अंधारात आहे.
