यवतमाळ: विधानसभेत कीट कापलं म्हणून भाजपाचे माजी आमदार राजू तोडसाम हे राष्ट्रवादीत…
=== मुख्य मुद्दे ===
● महाराष्ट्र बिजेपीत सुरु झाली घरघर.
● अनेक नेते बिजेपी शोडण्याच्या तयारीत.
● विरोधी पक्षनेते देवेंद्र फडणवीसाच्या नेतृत्त्वावर प्रश्न चिन्ह?
✒️यवतमाळ जिल्हा प्रतिनिधी✒️
यवतमाळ:- महाराष्ट्रात बीजेपी ने सत्ता गमवल्यानंतर पक्षाला उतरती कळा लागली आहे. 2019 च्या विधानसभा निवडणुकीपूर्वी मोठ्या प्रमाणात विरोधी पक्ष काँग्रेस राष्ट्रवादीतून पक्षांतर झालं होतं. भाजपात मेगाभरती सुरु होती आता जावक सुरु आहे. राज्यात सत्तांतर झालं आणि आता भाजपाला गळती लागल्याचं चित्र दिसून येत आहे. यवतमाळ जिल्ह्यातील आर्णी विधासभा मतदारसंघाचे भाजपाचे माजी आमदार राजू तोडसाम यांनी आज राष्ट्रवादी काँग्रेसमध्ये जाहीर प्रवेश केला.
प्रदेशाध्यक्ष जयंत पाटील आणि खासदार सुप्रिया सुळे यांच्या उपस्थितीत हा जाहीर प्रवेशाचा कार्यक्रम पार पडला. आदिवासी समाजाचा एक प्रामाणिक, होतकरु नेता राष्ट्रवादीत प्रवेश करत असल्याबाबत प्रदेशाध्यक्ष जयंत पाटील यांनी समाधान व्यक्त केले. तसेच राजू तोडसाम यांच्या पक्ष प्रवेशामुळे यवतमाळ जिल्ह्यात राष्ट्रवादी काँग्रेस पक्षाला आणखी बळकटी मिळेल अशी अपेक्षाही व्यक्त केली. तसेच भाजपामध्ये जुन्या नेत्यांना डावलले जात आहे. त्यातूनच तोडसाम यांच्यासारखा नेता आज आपल्या पक्षात प्रवेश करत आहे, याचा आनंद वाटतोय, असेही जयंत पाटील म्हणाले.
आर्णी विधासभा मतदारसंघाचे माजी आमदार आमदार राजू तोडसाम यावेळी म्हणाले की, मी भाजपामध्ये 10 वर्ष काम केले. सर्वांना सोबत घेऊन गेलो. मला 2014 साली आमदार म्हणून काम करण्याची संधी मिळाली. सत्ताधारी पक्षात काम करत असलो तरी विधानसभेत जयंत पाटील यांचे भाषण आवर्जून ऐकायचो. विरोधकांनाही मी मानसन्मान देत होतो. तसेच आदिवासींच्या प्रश्नावर वारंवार आवाज उचलत असल्यामुळे देवेंद्र फडणवीस यांनी माझे तिकीट 2019 च्या निवडणुकीत कापले. राष्ट्रवादी काँग्रेसमध्ये प्रवेश करण्याचा निर्णय घेतल्यानंतर देवेंद्र फडणवीस यांनी मला बोलावून पक्षात थांबायला सांगितले. मात्र मी राष्ट्रवादीतच प्रवेश करण्याचा निर्णय घेतला. भाजपा सोडत असताना माझ्या मागे ईडी लागेल याची मला चिंता नाही. मी आदिवासी माणूस असून माझ्याकडे काहीच नाही. चौकशी केली तरी काही सापडणार नाही असेही स्पष्ट केले.
यवतमाळ जिल्हातील पुसद विधानसभा क्षेत्राचे राष्ट्रवादी काँग्रेसचे आमदार इंद्रनील नाईक यांच्यासोबत या पक्षप्रवेश कार्यक्रमाला प्रदेशाध्यक्ष जयंत पाटील, खासदार सुप्रिया सुळे, अल्पसंख्यांक मंत्री नवाब मलिक, माजी आमदार संदीप बाजोरीया, प्रदेश सरचिटणीस शिवाजीराव गर्जे, यवतमाळचे जिल्हाध्यक्ष बाळासाहेब कामारकर, राष्ट्रवादी युवक काँग्रेसचे प्रदेशाध्यक्ष महेबुब शेख आदी उपस्थित होते.
