संपतीच्या वादातून मुलाने आणि सुनेने केली जन्मदात्या बापाची कुऱ्हाडीने हत्या.
✒औरंगाबाद जिल्हा प्रतिनिधी✒
पैठण/औरंगाबाद :- औरंगाबाद जिल्हातील पैठण तालुक्यातून एक खळबळजनक घटना समोर आली आहे. संपतीच्या वादातून जन्मदात्या मुलाने व सुनेने कुऱ्हाडीच्या दांड्याने मारहाण करून बापाला गंभीर जखमी केले. उपचारा दरम्यान त्यांचा मृत्यू झाला. रक्ताच्या नात्याला काळीमा फासणारी ही घटना पैठण तालुक्यातील बीडकीन पासून जवळ असलेल्या डोंगरू नाईक तांड्या या गावात घडली. मृतकाचे नाव राजू भूरा चव्हाण वय 50 वर्ष असे आहे.
जन्मदात्या मुलाने आणि सुनेने जन्म देणा-या बापास दि 16 रोजी मोठ्या प्रमाणात मारहाण केली होती. त्यामुळे गंभीररित्या जखमी अवस्थेत राजू भूरा चव्हाण याना औरंगाबाद येथील शासकीय वैद्यकीय महाविद्यालय रुग्णालयात उपचारासाठी दाखल करण्यात आले होते. दरम्यान उपचार सुरू असताना शुक्रवारी सकाळी राजू चव्हाण यांची प्राणज्योत मावळली. या प्रकरणी पोलिसांनी मुलगा व सुनेस ताब्यात घेतले आहे.
प्राप्त माहिती नुसार राजू भुरा चव्हाण यांचा मुलगा मांगीलाल व सून कोमल यांच्यात संपतीच्या वाटणी वरुन दि.16 नोव्हेंबर रोजी डोगरू तांडा येथे वाद झाला होता. या वादाचे पर्यावसन हे हत्येत झाले. मांगिलाल व त्याची पत्नी कोमल या दोघांनी राजू भुरा चव्हाण यांना कुऱ्हाडीच्या दांड्याने जबर मारहाण केली होती. गंभीर जखमी राजू भुरा चव्हाण यांच्यावर बिडकीन येथे प्राथमिक उपचार करून पुढील उपचारासाठी औरंगाबाद येथील घाटी रुग्णालयात दाखल करण्यात आले होते.
दरम्यान, राजू भुरा चव्हाण याच्यावर उपचार सुरू असताना शुक्रवारी त्यांची प्राणज्योत मावळली. याप्रकरणी, राजू भुरा चव्हाण यांची दुसरी सून अश्विनी कैलास चव्हाण यांच्या तक्रारीवरून बिडकीन पोलीस ठाण्यात गुन्हा दाखल करण्यात आला असून आरोपी मुलगा मांगीलाल राजू चव्हाण व सून कोमल मागिलाल चव्हाण यांना पोलिसांनी ताब्यात घेतले आहे. या प्रकरणाचा पुढील तपास बिडकीनचे पोलीस करत आहे.
