घरोघरी संविधान दिन व म. फुले स्मृती दिन साजरा करा, डॉ. अशोक जीवतोडे यांचे आवाहन
अश्विन गोडबोले
चंद्रपूर महानगर प्रतिनिधी
मो:8830857351
चंद्रपूर, 24 नोव्हेंबर: ओबीसींच्या न्याय हक्क व अधिकारांसाठी भारतीय संविधानात 340 वे पहिले कलम ओबीसींसाठी नमूद करण्यात आले आहे. त्या अनुषंगाने संविधानानेच ओबीसींना सन्मानाने जगण्याचा अधिकार दिला आहे. सोबतच महात्मा ज्योतिबा फुले यांनी त्यांच्या जिवन कार्यातून समतेचा व न्यायाचा संदेश दिला. त्यामुळे संविधान व महात्मा फुले स्मृती दिन हे दोन्ही दिवस ओबीसी समाजबांधवांनी मोठ्या जल्लोषात साजरे करावे, असे आवाहन ओबीसी नेते डॉ. अशोक जीवतोडे यांनी केले आहे.
ओबीसी समाजबांधवांनी गावोगावी घरोघरी दिंड्या, रॅली, प्रभात फेरी, व्याख्यान, प्रबोधन, सभा, मिरवणूक आदी विविध कार्यक्रमांच्या माध्यमातून संविधान दिन व महात्मा फुले स्मृती दिन साजरा करावा, असे सांगत महामानव डॉ. बाबासाहेब आंबेडकर यांनी भारतीय संविधानाद्वारे एससी. एसटी. व्हीजेएनटी व ओबीसी समूदायासाठी त्यांचे हक्क व अधिकार बहाल केले. त्यामुळेच विविधततेने नटलेल्या या देशात सर्व जात समुदायाला त्यांचा सर्वांगीण विकास साधण्याची संधी मिळाली. हीच संधी ओबीसींना संविधानाने उपलब्ध करून दिली आहे.
देशात संविधान सर्वोच्च आहे. संविधानच या देशातील प्रत्येक घटकाचे उत्थान करु शकते व करीत आहे. तसेच महात्मा ज्योतिबा फुले यांनी त्यांच्या कार्यातून आयुष्यभर शिक्षण, समानता, स्वातंत्र्य, अधिकार यासाठी लढा दिला. समाजात सर्वांगीण जागृती घडवून आणली. त्यांचे कार्य मोठे आहे. म्हणून ओबीसी समाजाने घरापासून सुरुवात करून आपआपल्या परिसरात संविधान दिन व महात्मा फुले स्मृती दिन मोठ्या उत्साहात साजरा करावा. समाजात जाणीव जागृती होईल असे कार्यक्रम घ्यावे, असे आवाहन डॉ. जीवतोडे यांनी केले आहे.
