पश्चिम क्षेत्र केंद्र सांस्कृतिक केंद्राच्या कार्यक्रम समितीच्या अध्यक्षपदी सुधीर मुनगंटीवार
अश्विन गोडबोले
मो: 8830857351
मुंबई, 20 एप्रिल:केंद्रीय सांस्कृतिक मंत्रालयाच्या अधिपत्याखाली असलेल्या राजस्थान येथील पश्चिम क्षेत्र सांस्कृतिक केंद्रातील कार्यक्रम समितीच्या अध्यक्षपदी राज्याचे सांस्कृतिक कार्यमंत्री सुधीर मुनगंटीवार यांची नियुक्ती करण्यात आली आहे. राजस्थानचे राज्यपाल व पश्चिम क्षेत्र सांस्कृतिक केंद्राचे अध्यक्ष कलराज मिश्रा यांच्या अध्यक्षतेत अलीकडेच झालेल्या बैठकीत कार्यकारी समितीने एकमताने मुनगंटीवार यांच्या नावावर शिक्कामोर्तब केले.
राज्याच्या सांस्कृतिक खात्याच्या मंत्रिपदाचा कार्यभार सांभाळल्यापासून सुधीर मुनगंटीवार यांनी केलेल्या कार्याची सांस्कृतिक विभागाने घेतलेली ही दखल असल्याचे मानले जात आहे. केंद्राच्या संचालक किरण सोनी गुप्ता यांनी नियुक्तीच्या संदर्भातील पत्र मुनगंटीवार यांना पाठविले आहे. मुनगंटीवार यांचा कार्यकाळ तीन वर्षांचा असणार आहे. मुनगंटीवार यांनी राज्याचे सांस्कृतिक कार्य मंत्री म्हणून आयोजित केलेले अनोखे सांस्कृतिक उपक्रम तसेच वेळोवेळी घेतलेले क्रांतिकारी निर्णय यांची केंद्रीय सांस्कृतिक मंत्रालयाने दखल घेतल्याचे बोलले जात आहे.
व्यापक कार्यक्षेत्र पश्चिम क्षेत्र सांस्कृतिक केंद्रांतर्गत राजस्थान, महाराष्ट्र, गुजरात, गोवा या राज्यांचा तसेच दमण, दीव आणि दादरा नगर हवेली या केंद्रशासित प्रदेशांचा समावेश आहे. मुनगंटीवार यांना सर्व सहा राज्यांमधील लोककलावंतांसाठी काम करता येणार आहे. विशेष म्हणजे या माध्यमातून महाराष्ट्रातील लोककलांना राष्ट्रीय पातळीवर मोठ्या प्रमाणात प्रोत्साहन देण्यावरही भर असणार, अशी माहिती सुधीर मुनगंटीवार यांनी दिली.
मे महिन्यात बैठक
पश्चिम क्षेत्र सांस्कृतिक केंद्राच्या संचालकांनी नियुक्तीच्या संदर्भातील पत्रात आगामी बैठकीचेही निमंत्रण दिले आहे. २०२३-२०२४ या वर्षात आयोजित करावयाच्या कार्यक्रमांचे नियोजन या बैठकीत होईल. ही बैठक सुधीर मुनगंटीवार यांच्या अध्यक्षतेत में महिन्यात होणार आहे.
