😱काय सांगता?…. चक्क शासनाच्या सेवकांनाच या गावात नो एन्ट्री🚧🔴 • गावकऱ्यांनी घोषित केली गावबंदी • शाळा, ग्रामपंचायत व शासकीय कार्यालये बंद

😱काय सांगता?…. चक्क शासनाच्या सेवकांनाच या गावात नो एन्ट्री🚧🔴

• गावकऱ्यांनी घोषित केली गावबंदी

• शाळा, ग्रामपंचायत व शासकीय कार्यालये बंद

🖋️ मीडिया वार्ता वृत्तसेवा
📱 8830857351

वरोरा : 16 फेब्रुवारी
वरोरा शहरापासून 22 किलोमीटर अंतरावर असणारे मांगली-तुमगाव हे मागील कित्येक वर्षांपासून शासकीय योजना आणि सोयीसुविधांपासून वंचित आहे. शासनाला बरेचदा निवेदन देण्यात आले. परंतु, त्यावर कोणताही तोडगा निघाला नाही, असा आरोप करीत गावकर्‍यांनी गुरूवारपासून या गावात येणाऱ्या शासकीय यंत्रणेवरच बंदी आणली आहे. गावकर्‍यांनी गावात येणार्‍या रस्त्याच्या मधोमध बैलबंड्या आडव्या करून शासकीय यंत्रणेला बंदी घातली आहे.
यावेळी गावातील जनतेने शासन विरोधी घोषणात दिल्या. तसेच कामचुकार अधिकार्‍यांचा निषेध केला. पाझरबोडी तलाव झालाच पाहिजे, शेतकर्‍यांच्या मालाला भाव मिळालाच पाहिजे, असे नारे देत रस्ता अडवून धरला. यावेळी गावकर्‍यांनी काळे झेंडे दाखवून निषेध व्यक्त केला. गावकर्‍यांनी शासनाला आपल्या मागण्या सादर केल्या आहे. जोपर्यंत या मागण्या पूर्ण होत नाही, तोपर्यंत गावबंदी उठणार नाही, असा निर्णय गावकर्‍यांनी घेतला आहे.
जलसंधारण विभागाच्या चुकीच्या धोरणामुळे तुमगावमधील 30 ते 40 वर्षांंपासून अपूर्ण बांधकाम झालेल्या पाझर तलावामुळे अंदाजे 150 एकर जमीन दरवर्षी पुरबुडीमध्ये जात आहे. याची दखल अजूनपर्यंत शासनाने घेतली नाही. सोयाबीन पिकावर ‘येलो मोझॅक’ रोग आल्याने शेतकर्‍यांना नुकसान भरपाई अद्याप सरकारने दिली नाही. शासनद्वारा राबविण्यात येणारी प्रधानमंत्री पीक विमा योजनेपासून 90 टक्के शेतकरी अजूनही वंचित आहेत. गारपीट झाल्याने शेतकर्‍यांचे अतोनात नुकसान झाले आहे. परंतु, अजूनपावेतो कोणताही निर्णय शासनाने घेतलेला नाही. गावात येणार्‍या रस्त्याची दुरावस्था झाली आहे, असा आरोपही यावेळी करण्यात आला. अशा बर्‍याच मागण्यांकरिता गावकर्‍यांनी गावबंदी केली असून, प्रशासकीय यंत्रणा अशीच उदासीन राहिल्यास येणार्‍या लोकसभेच्या निवडणुकीत गावकरी बहिष्कार टाकणार, अशी माहिती शेतकर्‍यांनी दिली आहे.