लाच प्रकरणी महसूल सहाय्यक अडकले एसीबीच्या जाळ्यात
रिव्हॉल्वर परवाना नूतनीकरणासाठी मागितली १५ हजारांची लाच
✍️ भवन लिल्हारे जिल्हा प्रतिनिधी भंडारा📱मो.नं.9373472847📞
भंडारा : रिव्हॉल्वर परवाना नूतनीकरणासाठी लाच मागणे एका महसूल सहाय्यकाला चांगलेच महागात पडले आहे. या प्रकरणी भंडारा एसीबीच्या पथकाने कारवाई करत या महसूल सहाय्यकाला लाचेच्या रकमेसह रंगेहाथ अटक केली आहे. उमेश्वर विठ्ठल गणवीर (वय ४० वर्ष ) असे या लाच मागणाऱ्या अधिकाऱ्यांचे नाव असून त्याला या प्रकरणी अटक करण्यात आली आहे. ही कारवाई आज बुधवारी २० मार्च २०२४ रोजी दुपारी १.०० वाजताच्या सुमारास भंडारा जिल्हाधिकारी कार्यालयालगत असलेल्या महसूल कॅन्टीनमध्ये उघडकीस आली आहे.
*रिव्हॉल्वर परवाना नूतनीकरणासाठी १५ हजारांची केली मागणी*
या प्रकरणातील तक्रारदार हे तुमसर येथील रहिवासी असून त्यांच्याकडे ३२ बोर रिव्हॉल्वर आहे. मात्र, मागील तीन वर्षांपासून त्यांनी त्यांचा परवाना नूतनीकरण केलेला नव्हता. त्यामुळे २०२१ पासून त्यांना शस्त्राचा परवाना नूतनीकरण कारायचे असल्याने त्यांनी आज भंडारा जिल्हाधिकारी कार्यालयातील दंड- २ शाखेतील महसूल सहायक विभागात संपर्क साधला. त्यासाठी आवश्यक कागदपत्र आणि शुल्क शासनाकडे जमा केले आहेत. मात्र, उमेश्वर गणवीर यांनी प्रकरणातील तक्रारदार यांना २० हजार रुपयांची लाच मागितली. त्यानंतर त्यांच्यात या रकमेवरुण भावबाजी झाली आणि अखेर मोठ्या तडजोडीनंतर १५ हजार रुपये देण्याबाबत ठरले.
*लाचप्रकरणी महसूल सहाय्यक एसीबीच्या जाळ्यात*
आवश्यक ते सर्व कागदपत्रे आणि सर्व नियम पाळून देखील पैसे देणे, ही बाब तक्रारदारांना पटण्यासारखी नसल्याने त्यांनी हे प्रकरण उघडकीस आणण्याचे ठरवेल. त्यानंतर त्यांनी उमेश्वरला थोड्यावेळात पैसे आणून देतो, असं सांगून तेथून काढता पाय घेतला आणि त्यानंतर या प्रकरणाची माहिती भंडारा लाच लुचपत प्रतिबंधक विभागाचे उपअधीक्षक डॉ. अरुणकुमार लोहार यांना देत तक्रार दाखल केली. त्यानुसार आज महसूल कॅन्टीन जवळ सापळा रचून लाच स्वीकारताना उमेश्वर गणवीर यांना रंगेहाथ ताब्यात घेतले.
या प्रकरणी भंडारा पोलिसात गुन्हा दाखल करून त्यांना अटक करण्यात आली आहे. ही कारवाई पोलीस निरीक्षक अमित डहारे, पोलीस उपनिरीक्षक संजय कुंजरकर, पोलीस कर्मचारी राजकुमार लेंडे, अतुल मेश्राम, अंकुश गाढवे, नरेंन्द्र लाखडे, शिलपेन्द्र मेश्राम,विष्णू वरठी ,विवेक रणदिवे ,अभिलाषा गजभिये, राहुल राऊत आदींनी केली.
