वैद्यकीय महाविद्यालय रुग्णालयातून घरफोडीच्या गुन्ह्यातील आरोपी फरार
२३ वर्षीय आरोपी हर्ष रामटेके उपचारादरम्यान फरार
आरोपी मध्यरात्री सुरक्षा रक्षकांना चकमा देत रुग्णालयातून फरार
त्रिशा राऊत नागपूर क्राईम रिपोर्टर मो 9096817953
नागपुर : – सविस्तर माहिती याप्रमाणे आहे की नागपूरच्या शासकीय वैद्यकीय महाविद्यालय रुग्णालयातून घरफोडीच्या गुन्ह्यातील २३ वर्षीय आरोपी हर्ष रामटेके उपचारादरम्यान पळून गेला. आरोपी मध्यरात्री सुरक्षा रक्षकांना चकवा देत रुग्णालयातून पळून गेला. त्यामुळे या घटनेची नागपुरात चांगलीच चर्चा होत आहे.नागपूरच्या शासकीय वैद्यकीय महाविद्यालय रुग्णालयातून (मेडिकल) शुक्रवारी मध्यरात्री एक आरोपी पळून गेल्याची धक्कादायक घटना उघडकीस आली आहे. घरफोडीच्या गुन्ह्यात अटकेत असलेला 23 वर्षीय आरोपी हर्ष महेद्र रामटेके हा उपचारादरम्यान रुग्णालयातून फरार झाला. या घटनेने पोलीस दलासह हॉस्पिटल प्रशासनात एकच खळबळ उडाली आहे. फरार आरोपी सीसीटीव्ही फुटेजमध्ये कैद झाला असून, त्याचा शोध घेण्यासाठी पोलिसांनी शोध मोहीम सुरु केली आहे. हर्ष रामटेके याला काही दिवसांपूर्वी घरफोडी प्रकरणी अटक करण्यात आली होती आणि त्याला नागपूर जिल्हा मध्यवर्ती कारागृहात ठेवण्यात आले होते. अटकेनंतर त्याची तब्येत बिघडल्याने त्याला मेडिकल रुग्णालयात दाखल करण्यात आले होते. वॉर्ड क्रमांक ३६ मध्ये त्याच्यावर उपचार सुरु होते. मात्र १७ मे रोजी रात्री दोन ते तीनच्या सुमारास, सर्व सुरक्षा यंत्रणांना चकमा देत तो रुग्णालयातून पळून जाण्यात यशस्वी झाला.हर्ष रामटेके पळून जात असताना रुग्णालयातील सीसीटीव्हीत कैद झाला आहे. हर्ष रामटेके वॉर्डमधून बाहेर पडताना एक सुरक्षा रक्षक खुर्चीवर बसलेला दिसतो, पण त्याने काहीच प्रतिक्रिया दिली नाही. हर्षने मुख्य दरवाजा उघडण्याचा प्रयत्न केला, काही क्षण त्यात अडथळा आला, मात्र त्याने दरवाजा उघडला आणि तो पळून गेला. त्यावेळी त्याने गुलाबी रंगाचं टी-शर्ट घातलं होतं. पोलीसांनी त्याचे छायाचित्र प्रसिद्ध केले असून नागरिकांना कोणतीही माहिती मिळाल्यास तत्काळ पोलीसांशी संपर्क साधण्याचे आवाहन करण्यात आले आहेया घटनेमुळे मेडिकलमधील सुरक्षा यंत्रणांच्या कार्यप्रणालीवर प्रश्नचिन्ह उपस्थित झाले आहे. आरोपी रुग्णालयात दाखल असताना त्याच्यावर कडक देखरेखीची आवश्यकता होती. मात्र, पोलीस आणि सुरक्षा रक्षकांच्या निष्काळजीपणामुळे तो सहजतेने पळून गेला. रात्रीच्या वेळी अशा गंभीर आरोपींवर अधिक दक्षता आवश्यक असताना ही ढिसाळ व्यवस्था अत्यंत गंभीर मानली जात आहे.पोलिसांनी घटनास्थळी भेट देत तपास सुरू केला आहे. आरोपीला मदत करणाऱ्या व्यक्तींची चौकशी केली जात आहे. संबंधित सुरक्षा कर्मचाऱ्यांवर कारवाई होण्याची शक्यता आहे. सध्या नागपूर आणि आसपासच्या परिसरात आरोपीचा शोध घेण्यासाठी विशेष पथके तयार करण्यात आली आहेत. या घटनेने पोलिसांच्या कार्यक्षमतेवर तसेच हॉस्पिटल प्रशासनाच्या सुरक्षिततेवर अनेक प्रश्न निर्माण केले आहेत. आरोपीला लवकरात लवकर पकडून कारागृहात परत पाठवण्यासाठी सर्व यंत्रणा कामाला लागली आहे.
