जोहान्सबर्ग: पाणी टंचाईचा सामना करत असलेल्या दक्षिण आफ्रिकेतील केपटाऊन शहराला या समस्येतून बाहेर काढण्यासाठी टीम इंडिया आणि दक्षिण आफ्रिका संघाने मदतीचा हात पुढे केला आहे. केपटाऊनमध्ये पाण्याच्या बाटल्या पोहचविण्यासाठी आणि बोअरवेल खोदण्यासाठी दोन्ही संघाने केपटाऊन शहराला ५.६ लाखाची आर्थिक मदत केली आहे.
टी-२० मालिकेच्या शेवटच्या सामन्यानंतर टीम इंडियाचा कर्णधार विराट कोहली आणि दक्षिण आफ्रिकेचा कर्णधार फाफ ड्यू प्लेसी यांनी ही रक्कम ‘द गिफ्ट ऑफ द गिवर्स फाऊंडेशन’कडे सुपूर्द केली. भारतीय संघ जेव्हा केपटाऊनला पोहचला होता, तेव्हा त्यांना पाण्याचा काळजीपूर्वक वापर करण्याच्या सूचना देण्यात आल्या होत्या. केवळ दोन मिनिटातच आंघोळ उरकण्याची विनंतीही भारतीय खेळाडूंना करण्यात आली होती. या शहरात पाणी टंचाईमुळे झाडांनाही पाणी देण्यात येत नसल्याचं टीम इंडियाच्या लक्षात आलं. या भीषण पाणी टंचाईची जाणीव झाल्यानंतर भारतीय संघाने येथील पाण्याची समस्या दूर करण्यासाठी हे आर्थिक सहाय्य केल्याचं सूत्रांनी सांगितलं.
