जोधपूर:
काळवीट शिकार प्रकरणात पाच वर्षांची शिक्षा झालेला व जामिनासाठी धडपड करणारा अभिनेता सलमान खान याचे वकील महेश बोरा यांना धमकी देण्यात आली आहे. ‘सलमानची वकिली करू नका. खटल्यापासून दूर राहा,’ असं त्यांना धमकावण्यात आलं आहे.
न्यायालयानं शिक्षा ठोठावल्यानंतर सलमानला काल जोधपूर मध्यवर्ती कारागृहात नेण्यात आलं. त्यानंतर बोरा यांनी त्याच्या जामिनासाठी अर्ज केला होता. त्यांच्या जामीन अर्जावर सुनावणीही झाली. मात्र, काल सलमानला जामीन मिळू शकला नाही. याच दरम्यान काल रात्री बोरा यांना फोनवरून धमक्या देण्यात आल्या. धमकीचे एसएमएस पाठवण्यात आले. ‘सलमानच्या जामिनावरील सुनावणीला हजर राहू नका,’ असं त्यांना फोनवरून सांगण्यात आलं. खुद्द बोरा यांनीच ही माहिती दिलीय. या प्रकरणी त्यांनी जोधपूरच्या पोलीस आयुक्तांकडं तक्रार केली आहे.
