मुंबई : दिग्दर्शक रवी जाधवच्या ‘न्यूड’ या मराठी सिनेमासमोरील संकट कमी होण्याचं नाव घेत नाहीए. सिनेमा कथेवरून कॉपीराइट्सचा नवा वाद आता समोर आला आहे. पटकथा लेखक मनीष कुलश्रेष्ठचा दावा आहे की न्यूड सिनेमाची कथा ही त्यांची कथा ‘कालिंदी’ वरून सरळसरळ उचलली आहे. परिणामी सिनेमाचं रिलीज थांबवण्यात आलं आहे. २७ एप्रिलला हा सिनेमा प्रदर्शित होणार होता.
प्रदर्शनापूर्वीच वादाच्या भोवऱ्यात सापडलेल्या या सिनेमाभोवतीच्या सर्व समस्या दूर होऊन आता कुठे तो प्रदर्शित होत होता, तोच हे नवं संकट उभं ठाकलं आहे. इंटरनॅशनल फिल्म फेस्टिव्हल ऑफ इंडियाच्या ज्यूरींनी संमती देऊनही प्रत्यक्ष फेस्टीव्हलमधून हा सिनेमा वगळला होता आणि त्यावरून वादंग उठला होता. जानेवारी २०१८ मध्ये या सिनेमाला सेन्सॉर बोर्डाचं ‘अ’ प्रमाणपत्र मिळालं होतं. येत्या २७ एप्रिलला तो प्रदर्शित होणार होता. मात्र हा नवा कॉपीराइट इश्यु थेट कोर्टापर्यंत पोहोचला आहे. दिल्ली कोर्टाने हा सिनेमा तूर्त प्रदर्शित न करण्याचा निर्णय दिला आहे.
