पत्नीने दिली पतीच्या हत्येची सुपारी; पत्नी अटकेत.
प्रातिनिधी
नागपूर:- मध्ये पत्नीने पतीच्या हत्येची सुपारी देऊन पतीची हत्या करण्यात आल्याची बातमी समोर आली आहे. त्यामुळे सर्व परीसरात या घटनेची चर्चा सुरू आहे. पत्नीनेच पतीच्या हत्येची सुपारी दिल्याचे उघड झाले. पती नेहमी मारझोड करतो, त्रास देतो म्हणून त्याचा काटा काढण्यासाठी पत्नीने त्याच्या हत्येची सुपारी दिली. 50 हजारात पतीची हत्या घडवून आणणाऱ्या महिलेला आणि तिच्या एका साथिदाराला केळवद पोलिसांनी अटक केली आहे. जयदीप लोखंडे वय 39,रा. सावनेर असे या प्रकरणातील मृतकाचे तर त्याची पत्नी देवका उर्फ कविता लोखंडे, चंदन नत्थु दियेवार वय 28 आणि सुनील जयराम मालवीय वय 27 अशी आरोपींची नावे आहेत. जयदीप कविताला मारहाण करीत असे. ती त्याच्या जाचाला कंटाळली होती. त्याला संपविण्यासाठी तिने चंदनला हाताशी धरले. जयदीपचा खून करायचा आहे, त्यासाठी तुझी मदत हवी असल्याचे तिने त्याला सांगितले. या दोघांनी सुनीलला जयदीपचा काटा काढण्यासाठी 50 हजार रुपयांची सुपारी दिली. हत्येची ही घटना 9 ऑक्टोबर रोजी घडली. जयदीप आणि चंदन एकमेकांना ओळखतात. याचा फायदा चंदनने घेतला. आज सुनीलचा वाढदिवस आहे, आपल्याला पार्टीसाठी शेतावर जायचे असल्याचे चंदनने जयदीपला सांगितले. त्याला शेतात नेऊन त्याच्यावर चाकूहल्ला करत त्याची हत्या केली. ग्रामीण गुन्हे शाखेचे वरिष्ठ पोलिस निरीक्षक अनिल जिट्टावार आणि केळवद पोलिस ठाण्याचे पोलिस निरीक्षक सुरेश मट्टामी यांच्या चमूने केलेल्या एकत्रित कारवाईत या हत्येचा उलगडा झाला. पोलिसांनी कविता आणि चंदन यांना अटक केली आहे. सुनील अद्याप फरार आहे.
