कुष्ठरुग्ण व सक्रीय क्षयरुग्ण शोध मोहिम
🖋️ अश्विन गोडबोले
चंद्रपूर महानगर प्रतिनिधी
📱 8830857351
चंद्रपूर : चंद्रपूर तालुक्यातील सर्व प्राथमिक आरोग्य केंद्राच्या कार्यक्षेत्रामध्ये कुष्ठरोग शोध मोहिम व सक्रीय क्षयरुग्ण शोध मोहिम दिनांक १३ सप्टेंबर ते ३० सप्टेंबर २०२२ या दरम्यान राबविण्यात येत आहे. ही मोहिम यशस्वीपणे राबविणे व जनजागृती करण्याकरिता तालुका स्तरावर तालुका समन्वय समितीची सभा चंद्रपूर पंचायत समितीचे गटविकास अधिकारी आशुतोष सपकाळ यांच्या अध्यक्षतेखाली पार पडली. सभेला तालुका आरोग्य अधिकारी, डॉ. नटवरलाल श्रृंगारे, गटशिक्षणाधिकारी, निवास कांबळे, बाल विकास प्रकल्प अधिकारी आरती जगताप, डी. एम. गौरकार, बी. पी. मडावी, एम. एस. नन्नावरे, बिरेंद्र पाझारे, अमोल जगताप, पाटलीण आसुटकर, अक्षय देशमुख, रोहीदास राठोड हजर होते.
ही मोहिम तालुक्यातील ४ प्राथमिक आरोग्य केंद्रातील ९९ गांवामध्ये १,४९,८३५ लोकसंख्येच्या ३८७५२ घरांमध्ये एकुण १४ दिवस यशस्वीपणे राबविण्याकरिता एकुण १७१ चमू, ३४ पर्यवेक्षकांची नियुक्ती करण्यात आलेली आहे. या कालावधीमध्ये चमुव्दारे गांवातील प्रत्येक घरी भेट देवून महिलांची तपासणी आशा स्वयंसेविकाद्वारे व पुरुषांची तपासणी पुरुष स्वयंसेवकाद्वारे करण्यात येणार आहे. तरी सर्व नागरिकांनी आपल्या घरी तपासणी करिता आलेल्या चमूला आपली शारीरीक तपासणी करण्याकरिता सहकार्य करावे असे आवाहन गट विकास अधिकारी आशुतोष सपकाळ यांनी केले आहे.
समाजातील निदान न झालेले कुष्ठरुग्ण लवकरात लवकर शोधून त्यांना त्वरीत बहुविध औषधोपचाराखाली आणणे, नविन सांसर्गिक कुष्ठरुग्ण शोधून बहुविध औषधोपचाराद्वारे संसर्गाची साखळी खंडीत करून होणारा प्रसार कमी करणे, समाजात कुष्ठरोगाविषयी जनजागृती करणे, कुष्ठरोग दुरीकरणाचे ध्येय साध्य करून कुष्ठरोग निर्मुलनाच्या दिशेने वाटचाल करणे तसेच याच मोहिमेदरम्यान सक्रीय क्षयरुग्ण शोध मोहिम राबविण्यात येत असून क्षयरोगाचे निदान न झालेल्या समाजातील क्षयरुग्णांचा शोध घेऊन त्यांना क्षयरोग औषधोपचारावर आणने, मोहिमेमध्ये प्रतिक्षित पथकाद्वारे गृहभेट देऊन क्षयरोगाची लक्षणे असणाऱ्या व्यक्तींना शोधणे, संबंधीत क्षयरुग्णांचे पंकी नमुने व एक्स रे तपासणी तसेच आवश्यकतेनुसार इतर तपासण्या करून क्षयरोगाचे निदान करणे आणि औषधोपचार सुरु करणे, समाजात क्षयरोगाविषयी जनजागृती करणे हे या मोहीमेचे उद्दीष्ट आहे.
