दुचाकीस्वार महिला आणि तिची नणंद यांची छेड काढली महिलेला शिवीगाळ करून धमकावले.
त्रिशा राऊत नागपुर जिल्हा ग्रामीण प्रतिनिधीं मो 9096817953
नागपूर : काही समाजकंटकांनी दुचाकीस्वार महिला आणि तिची नणंद यांची छेड काढली. विरोध केला असता शिवीगाळ करून धमकावले. मात्र, महिलेने न घाबरता हिंमत दाखवली आणि एका आरोपीला पकडून चांगला चोप दिला. यामुळे चिडून आरोपीने वीट मारून महिलेचे डोके फोडले. ही घटना पाचपावली पोलिस ठाण्यांतर्गत घडली. पोलिसांनी पीडितेच्या तक्रारीवरून एका आरोपीला अटक केली.
आदित्य उर्फ बल्ली विकास बब्बर (वय 20 रा. पाचपावली) असे अटकेतील आरोपीचे नाव आहे. त्याचे दोन साथीदार फरार असून, पोलिस त्यांचा शोध घेत आहेत. पीडित महिला आणि तिची नणंद या दोघीही नृत्यांगणा आहेत. रविवारी रात्री साडेआठच्या सुमारास पीडित महिला आणि तिची नणंद दुचाकीने घरी जात होत्या.
दरम्यान, दुचाकीवर ट्रीपल सीट असलेल्या आदित्य आणि त्याच्या साथीदारांनी अचानक त्यांच्या वाहनावर आपले वाहन थांबविले. कोणतेही कारण नसताना दोघींनाही शिवीगाळ करू लागले. महिलेने जाब विचारला असता आरोपींनी अश्लील कृत्य केले. महिलेने हिंमत करून आदित्यला पकडले. त्याच्या कानशिलात लगावल्या. हे पाहून इतर दोन आरोपींनी पळ काढला.
महिलेच्या डोक्यावर फेकून मारली वीट
आदित्यने रस्त्यावर पडलेली वीट उचलून महिलेच्या डोक्यावर मारली. त्यानंतर रक्ताची धार लागली. आसपासच्या लोकांनी गर्दी केली. आदित्यही तेथून फरार झाला. पीडितेने घटनेची माहिती पोलिसांना दिली. पाचपावली पोलिस घटनास्थळावर पोहोचले. रक्तबंबाळ अवस्थेत फिर्यादीला मेयो रुग्णालयात दाखल करण्यात आले. तिच्यावर उपचार सुरू आहेत.
