सिंदेवाही पंचायत समिती परिसरात बिबट्याचा धुमाकूळ
◾बिबट्याला पकडण्याचे वनविभागाचे शर्थीचे प्रयत्न
🖋️ मीडिया वार्ता वृत्तसेवा
📱 8830857351
सिंदेवाही : 28 डिसेंबर
मागील आठवडाभरापासून सिंदेवाही पंचायत समिती परिसरात बिबट्याने धुमाकूळ घातला असून परिसरात दहशतीचे वातावरण निर्माण झाले आहे. सकाळी “मॉर्निंग वॉक”साठी जाणाऱ्या नागरिकांना आणि सायंकाळीं परिसरातील अनेकांना बिबट्याचे रोज दर्शन होत आहे.
सिंदेवाही पंचायत समिती परिसरात आजूबाजूला झुडपी जंगल असून याच परिसरातील घोडाझरी जलसंपदा विभागाच्या कार्यालय जवळ बिबट्याचे बस्तान मांडले आहे. अशातच मागील आठवड्यापासून पंचायत समितीच्या परिसरात अनेकांना बिबट्याचे दर्शन झाले असून सकाळी मॉर्निंग वॉक साठी जाणाऱ्या नागरिकांना रोजच बिबट्याचे दर्शन होत असल्याने अनुचित घटना घडण्याची शक्यता निर्माण झाली आहे. दरम्यान याबाबतची माहिती सिंदेवाही वनपरिक्षेत्र कार्यालयात देण्यात आली. त्यानुसार वनपरिक्षेत्र अधिकारी विशाल सालकर यांच्या नेतृत्वात कार्यालयातील कर्मचारी यांनी पंचायत समितीच्या परिसरात सहा ट्रॅप कॅमेरे लावले असून बिबट्याला ट्रॅप करण्यासाठी दोन ठिकाणी पिंजरे सुद्धा ठेवण्यात आले असल्याची माहिती वनविभागाकडून देण्यात आली आहे. असे असले तरी बिबट्याची भ्रमंती परिसरात सुरू असल्याने लोनवाही, रेल्वे स्टेशन परिसर या भागातील नागरिकांत भीतीचे वातावरण निर्माण झाले आहे. वनविभागाच्या शर्थीच्या प्रयत्नात बिबट्या कॅमेरा मध्ये कैद होणार की, थेट पिंजऱ्यात ट्रॅप होणार? याकडे नागरिकांचे लक्ष लागले आहे.
