कशेळे गावचे सुपुत्र Dy.Sp. विलास मते यांचा सत्कार
✒️संदेश साळुंके✒️
कर्जत रायगड प्रतिनिधी
📞9011199333📞
कशेळे कर्जत : – घरची परिस्तिथी अत्यंत हालाखीची असताना कशेळे गावातील विलास मते यांनी कठोर परिश्रम घेऊन कॉन्स्टेबल ते पोलिस उपअधीक्षक या पदापर्यंत घेतलेली भरारी स्पर्धा परीक्षा देणाऱ्या मुलांसाठी नक्कीच प्रेरणादायी आहे.पोलीस खात्यातील इतक्या मोठ्या पदापर्यंत पोहचणारा कर्जत तालुक्यातील पहिलाच अधिकारी असल्याने त्यांचा सत्कार कशेळे ग्रामस्थांच्या वतीने त्यांचा सत्कार करण्यात आला.
सत्कारमूर्ती म्हणून आपले मनोगत व्यक्त करताना प्रतिकूल परिस्थितीत शिक्षण घेताना काय अडचणी आल्या, आपल्या आईने किती वेळा गळ्यातील मणी गहाण ठेवले या बद्दल सांगताना त्यांचा गळा दाटून आला आणि उपस्थितांचे मन हेलावले.दहावी पास झाल्यानंतर कर्जत कॉलेजला जाण्यासाठी मुगावकर सर यांनी पैसे दिले, म्हात्रे सरांनी फी साठी पैसे दिले, मारुती पाटील शिक्षकाने दोन शर्ट आणि पँट दिल्याबद्दल ची कृतज्ञता त्यांनी बोलून दाखवली. किरवली येथे मावशीकडे सत्तावीस जणांच्या कुटुंबात जे मिळेल ते खाऊन समाधानी राहून बी कॉम पर्यंतचे शिक्षण घेतले.
काही झाले तरी पोलीस व्हायचेच हे स्वप्न मनाशी बाळगून ध्येयपूर्ती कडे वाटचाल करताना अथक परिश्रम घेऊन स्पर्धा परीक्षा दिल्या. नोकरी करताना एखाद्या शिकलेल्या मुलावर गुन्हा नोंद होणार असेल तर त्याचे भवितव्य बरबाद होऊ नये या करिता फिर्यादी आणि आरोपी यांच्यात समन्वय घडवून आणण्याचा प्रयत्न केला.ज्या ठिकाणी नोकरी केली तेथे मोठा मित्रपरिवार जमावीला.
लाच लुचपत प्रतिबंधक विभागात असताना महत्वाच्या ठिकाणी कारवाई करताना वरिष्ठांनी प्रत्येक वेळी आपल्यावर कामगिरी सोपवली आणि ती यशस्वी पार पाडली.
नोकरी निमित्त अनेक दिवस घरापासून लांब रहावे लागत असताना पत्नीने मुलांच्या शिक्षणाची जबाबदारी समर्थपणे पार पाडली म्हणून मी नेहमीच निश्चिंत राहिलो असा उल्लेख करून पत्नीचेही आभार मानले.
विलास मते यांचे कशेळे गावातील लहानपणी च्या मित्रांनी शैक्षणिक काळात ते घेत असलेल्या मेहनतीचा उल्लेख करून, सगळेच ज्यांना साहेब बोलतात त्यांचे बालमित्र असल्याचा आम्हाला अभिमान आहे असे मनोगत व्यक्त केले.
तालुक्यातील पोलीस भरती साठी प्रयत्न करणारी किंवा स्पर्धा परीक्षा देणारी मुले यांना पाहिजे ते मार्गदर्शन करून जास्तीत जास्त मुलांनी स्पर्धा परीक्षेत यश संपादन करावे, याच बरोबर पुढील महिन्यात होणाऱ्या पोलीस भरतीत कर्जत मधील जास्तीत जास्त मुलांना नोकरी मिळावी या करिता त्यांना अभ्यासक्रमा व्यतिरिक्त उपयुक्त मार्गदर्शन करणार असून तुम्हाला पाहिजे तितक्या वेळा मी हजर राहील असे त्यांनी सांगितले.
आपल्या गावच्या सुपुत्राचा सत्कार करण्यासाठी कशेळे ग्रामस्थांनी मोठ्या प्रमाणावर गर्दी केली होती. विलास मते (पोलिस उपअधीक्षक) यांच्या सत्कारतून स्फूर्ती घेऊन गावातील अनेक तरुण उज्वल कामगिरी करतील अशी भावना ग्रामस्थांनी व्यक्त केली.
